ما يجب ان تعرفة عن أجهزة المطابخ الbuilt in

“أصعب قرارات البنات والستات اللي بتجهز مطبخها هي انها تجيب بوتاجاز عادى والا بلت ان
البوتاجاز بالنسبة لنا كان طول عمره شكلة مربع صاج، و كان لونه أبيض وصغير وبعدين بقى فى منه باللون الأسود وكمان استانلس استيل لما غيرت البوتاجاز وجبت واحد جديد. مكنتش متخيل إن اختيار البوتاجازات له أسس كتير أوي فهمتها لما نزلت بنفسي لأول مرة أشوف البوتاجازات وأسأل واستكشف مميزات وعيوب كل نوع البوتاجاز، واعرف الفرق بين البوتاجاز العادي والبوتاجاز البلت إن وكمان البوتاجاز الغاز والكهرباء”
والمقال دة كان النتيجة، لو هتشتري بوتاجاز جديد سواء كنتوا عرسان جداد أو بتجديده مطبخكم محتاجين تجوبه على شوية أسئلة جمعنها لكوا هنا.
اشتري بوتاجاز عادي ولا بلت إن؟
البوتاجاز العادي هو الوحدة الكاملة اللي فيها فرن وعيون بوتاجاز من فوق، وهو البوتاجاز اللي تقريبًا عند أمهاتنا كلنا.

البوتاجاز البلت إن فهو حاجة جديدة علينا إلى حد ما.
هو بالظبط عبارة عن بوتاجاز وفرن منفصلين جوا المطبخ، و فى منه الغاز و فى منه الكهرباء.
وتقدرى تحطيهم بشكل منفصل عن بعض كل حاجه منهم بمكان على حسب تصميم المطبخ بتاعك وانتشر بعد زيادة برامج وقنوات الطبخ اللي الشيف دايمًا بيطبخ فيها على بوتاجاز مسطح في قلب رخامة المطبخ.

البوتاجاز البلت إن منتشر من زمان في أوربا وأمريكا وبيستخدموا خصوصأ في المطبخ الأمريكي اللي هو بيكون مفتوح على الصالة.

مميزات وعيوب البوتاجاز البلت إن والبوتاجاز العادي
السعر
• من حيث السعر مش نقدر نقول مين أغلى أو أرخص؛ لأن فيه بوتاجازات عادية بـ 8000 جنيه زي ما فيه بوتاجاز بلت ان بـ 5000 جنيه بس. الموضوع في الحالتين بيتوقف على ميزانيتك اللي مخصصاها لشراء البوتاجاز.
• في نفس الوقت كل ست أدرى باستخدامها للبوتاجاز، يعني واحدة استخدامها للفرن أكتر من عيون البوتاجاز والعكس.
• بس في شكل المطبخ ككل البلت إن بيكون شكله أشيك لأنه مش هياخد مساحة.
• البلت إن بيكون أسهل في التنضيف.
• في المطبخ الصغير كتير بيفضل البوتاجاز البلت إن عشان المساحة، وهي حاجة تحدديها على حسب مساحة مطبخك.
المساحة
• طبعا البلت إن يكسب في الحتة دي.
• البوتاجاز البلت إن؛ مش بيزود أي مساحة خالص في المطبخ وبيكون مثالي للمطابخ الصغيرة.
• على عكس البوتاجاز العادي وخصوصا الـ 5 شعلات اللي بياخد مساحة كبيرة نسبيا في المطبخ.
التركيب
• تركيب البوتاجاز العادي سهل جدًا وأي صنايعي هتجيبيه هيكون فاهم في الحتة دي على عكس البلت ان.
• بوتاجاز وفرن البلت إن بتحتاجي تفصلي المطبخ بالكامل على حسب مكانهم.
• ولما دورت وسألت كام حد لقيت ستات اشتكت من فكرة توصيل الغاز وإن لو وصلة الغاز للبلت ان متظبطتش كويس – عشان الصنايعي مش شاطر – دا بيسبب مشاكل كتير في البوتاجاز وقوة شعلته.
• بنصحك إنك ضروري تعتمدي على فني أو متخصص من شركة الغاز عشان تركيب الغاز للبوتاجاز أو صيانة تركيبة الغاز ودا عامل أمان مهم.
• عموما لو تفضلي تشتري البلت إن يبقى تشتري البلت ان الأول ومن بعده المطبخ وتجيبي صنايعي شاطر يكون وصل بوتاجاز بلت إن قبل كده عشان يركب لك الغاز.
الوظائف
• البوتاجاز العادي فيه عيون وكمان فرن.
• البوتاجاز البلت إن عيون لوحدها، وبعدين تشتري الفرن لوحده، ودي ميزة عشان ممكن تحطي البوتاجاز في حته والفرن في حته تانية، وبكدا تقفي براحتك أدام البوتاجاز من غير ما تتضايقي من سخونية الفرن.
• الفرن في الحالتين: ممكن تختاري حجمه، والميزة في البلت إن إنك مش مقيدة تجيبه في نفس حجم البوتاجاز بمعنى إنك ممكن تجيبي بوتاجاز صغير و فرن كبير أو العكس ودا بيكون على حسب استخدامك للفرن قليل أو كتير. وكمان ممكن البوتاجاز يكون غاز والفرن عادي أو العكس، ودي مميزات مش موجودة في الفرن البوتاجاز العادي عشان بيكون الفرن والبوتاجاز مدمجين سوا.
• نصيحة الخبيز بيكون أحسن في الفرن الكهرباء عشان بتقدري تظبطي درجة الحرارة بالظبط وكمان اتجاه الحرارة.
في حالة قرارك لشراء البوتاجاز البلت إن هيقابلك سؤال تاني:
السؤال التاني: أجيب البلت إن السيراميك التاتش الكهرباء ولا البلت إن العادي الغاز؟
• النقطة دي الستات جاوبت عليها وقالوا البوتاجاز البلت إن العادي أحسن.
• فيه تجارب مع البوتاجازالبلت إن السيراميك إنه بيبوظ بعد شوية أو بيتجرح وكمان التاتش مرات بيبوظ وصعب تلاقي اللي يصلح التكنولوجي المتقدمة دي في مصر وغالبًا هيكلف كتير في تصليحه ده الا إذا اشتريناه من مكان محترم وليه مركز خدمة وصيانة معتمد.
• لكن في الناحية الثانيةمقابلتش أي شكاوى من الستات اللي استعملت البلت إن العادي.
• بس برضه لازم نكون حقانين البلت إن السيراميك الكهرباء هايل في نضافته وفي شكله المودرن اللي بيغير شكل المطبخ كُليًا.
السؤال التالت: كهرباء ولا غاز؟
• من تجربتي مع فرن وبوتاجاز الغاز و الكهرباء هقولكم مميازاتهم
• البوتاجاز الكهرباء بياخد وقت أطول شويه عشان يسخن وكمان وبمجرد وصوله درجة الحرارة بيفصل، وكنت دايمًا أعلى على درجة الحرارة المطلوبة درجة أو اتنين عشان أخلي البوتاجاز يسخن أسرع.
• الفرن الكهرباء يمكن مش بياخد نفس الوقت زي البوتاجاز وبيسوي الأكل كويس جدًا.
• الفرن الكهرباء بيسوي الأكل أحلى وبالذات في الخبيز.
• و دايماًناخد بالنا ان الفرن الغاز مش بتشتغل الشواية و الفرن مع بعض ابداً الا اذا الشواية كانت كهرباء.
• عكس الفرن الكهرباء ممكن نشغل الفرن و الشواية مع بعض بالاضافه الى المروحه كمان.
• بس طبعا تاخدي بالك وانتي بتشتري من عوامل الأمان في البوتاجاز وتتأكدي إنه بيفصل الغاز في حالة انطفاء النار وخصوصًا لو فيه عندك أطفال في البيت.

بوتاجاز 5 شعلة ولا بوتاجاز 4 شعلة
قرارك في الحتة دي بيتوقف على استخدامك، الفرق في السعر بين الاتنين مش كبير اوي.
في أسعار بتزيد كتيرعن كده وممكن توصل لحد 15000 جنيه وأكتر و دي تحدديها على حسب الحاجة والاستخدام، و اذا كان غاز و الا كهرباء و الا كهرباء اندكشن لكن برده تقدري تجيبي حاجة كويسة و بتمن معقول.
طريقة استخدامك للبوتاجاز
فكري في استهلاكك انتي للبوتاجاز
• هل بتطبخي كميات كبيرة وبتستخدمي حلل كبيرة بس بعدد قليل؟ يبقى هاتي الـ4 شعلات.
• هل حللك مش واسعة نسبيا وممكن تترص على 5 شعل كلهم جنب بعض؟ يبقى هاتي الـ 5 شعلات.
• كان نزل كمان في السوق 6 شعلات ولكنه مش عملي، عشان الحلل بشكلها الضيق من تحت وواسع من فوق أو الحلل الكبيرة مش هتساع بعضها على الـ 6 شعلات.
دي شوية نصايح من الستات تاخدي بالك منها وانتي بتشتري البوتاجاز
1. خلي بالك من التفاصيل الصغيرة ومميزات البوتاجاز اللي بتشتريه زي مثلًا ذاتي الاشعال ولا لأ؟ سهل التنظيف؟ مروحة الفرن كويسة؟ الشواية والفرن بيشتغلوا سوا ولا لأ؟ فيه تايمر للفرن؟
2. أحسن الأنواع في السوق دلوقتي هو النوع الإيطالي و الفرنساوى و الالمانى كمان و فى اغلبهم بيكون التجميع بتاعهم بس اما فى تركيا و اما فى الصين بس مش معنى كده ان مستواهم مش كويس او صناعتهم مش كويسه لا خالص هى نفسها الشركة و ليها مصنعها بتركيا و الصين و بتصحل على نفس الجودة على سبيل المثال كل منتجات شركة ابل الامريكية مصنعه و مجمعه بالصين واللي يمكن أسعارها عالية شوية لكنها هتعيش معاكي.
3. خللي بالك من نوع حامل الأواني وحددي الأول هل هو مناسب لنوع الحلل اللي عندك ولا لأ؟ يعني مثلًا بيكون حديد ودا بيستحمل أكتر وبيكون ثابت أكتر ولكن تنضيفه ممكن يكون أصعب. وفي نوع بيكون معدن أخف شوية و دا مش بيكون ثابت أوي مع الحلل الكبيرة بالذات لكن تنضيفه أسهل وطبعًا البوتاجاز السيراميك تنضيفه أسهل وثباته مضمون أوي لأنه مسطح.
4. و طبعاً هنا احنا بننصح بالحوامل المصنوعه من الزهر لقوه تحملها و طريقة توزيعها للحرارة تحت الحلل و الاوانى المستخدمة.
5. الشفاط حاجة مهمة جدًا خصوصًا في المطبخ المفتوح عشان لما تطبخي متقلبيش ريحة البيت كله.. يُفضل أن يكون الشفاط بنفس مساحة البوتاجاز من فوق، وعمومًا الشفاطات الجديدة شكلها و موديلاتها تتناسب مع ديكورات المطبخ.

شفاط للمطبخ
طبعاً فى انواع كتير على حسب ديكور و شكل مطبخك و على حسب ميزانيتك اللى محدداها و اذا كان هيشتغل بطرد خارجى و الا بفلتر كربونى و ده بيتغير كل فتره تتراوح من 3 الى 5 شهور على حسب استخدامنا.
و الفلتر الكربونى بيقلل قدرة الشفط بنسبة حوالى 20% بالاضافة الى انه بيقوم بإعادة تدوير الهواء الساخن تانى بالمطبخ, على العكس تماماً الطرد الخارجى بياخد كل الروائح و الهواء السخن بره المطبخ.
افضل طريقة للاستفادة بشفاط المطبخ هو اننا نعملة طرد خارجى و ده للاستفادة بالقدرة الكاملة للشفاط و طبعاً لازم نعمل حسابنا فى التجهيزات دى من الاول:
يتم عمل فتحة دائرية قطرها 13سم في الحائط علي ارتفاع 230سم من الارض ومثبت بها مصورة قطرها 5 بوصة بطول 40سم 0مع ترك 5سم بارزة من ناحية الشفاط ليتم تركيب خرطوم الطرد (الفلكسبل) بها.
اذا كان الشفاط (جزيرة) أي سقفي يكون مخرج الكهرباء من السقف بطول 1متر- ويكون خروج خرطوم الطرد الخارجي من الشفا ط الي السقف (اذا كان فوقه الفراغ) او يمر بالسقف الساقط الي الخارج. ”
وكده انتهت مقالتنا النهاردة .. ومازال المطبخ عالم لاينتهي …
مقالتنا عن المطابخ مستمرة …

م.هبة دبور

14199205_10155236300894966_2642082914060161780_n oven oven1 oven2 oven3 oven4 oven5 oven6 oven7 oven8 oven9 oven11 oven13 oven14 sh1 sh2 sh3 sh4 sh5 sh7 sh8 sh9 sh10 sh12 sh13

Facebook Comments

Related Post

thumbnail
hover

دهانات المطابخ..نصائح واستفسارات

دهانات المطابخ 1-الاستر .. الي هو بيبقي لون الخشب و بصبغات ده ليه اكتر من طريقة...

thumbnail
hover

المطبخ أساسيات وأبعاد

المطبخ .. مملكتك         المطبخ فراغ .. يدخله كل افراد ااسرة بلا استثناء , يدخله ...

thumbnail
hover

دفايات الإيثانول.. تدفئة وجمال للمنزل

مع الانخفاض المتواصل لدرجات الحرارة، تبقى الدفايات هى الحل السحرى لتدفئة ال...